Galicia mantense á cabeza na ratio de librarías por habitantes

A Confederación de Gremios de Librarías de España (CEGAL) daba a coñecer este 16 de setembro as conclusións do Mapa de Librerías 2021. Esta análise repasa a nivel estatal o número e as características dos establecementos dedicados á venda do libros, e nos seus datos destaca que Galicia está á cabeza na densidade de librarías respecto á poboación. En conxunto, Cegal cifra en 299 o número de librarías existentes no noso país, o que dá unha ratio de 11,1 librarías por cada 100.000 habitantes.

A cifra case duplica a media estatal, que é só de 6,8, pero supón un descenso respecto dos datos de 2015, cando había en Galicia 14,4 librarías por cada 100.000 habitantes. Daquela a nosa era tamén a comunidade con maior número de tendas de libros por poboación. O número de librarías existente en Galicia supón só o 9,3% das que se manteñen abertas no conxunto do Estado no último ano.

Sen detallar máis datos a nivel autonómico, o estudo de CEGAL apunta tendencias como a idade das librarías a nivel estatal, coa metade en activo desde hai corenta anos ou máis, e unha ampla presenza de mulleres no negocio, cun 59,7% das persoas empregadas. Destaca tamén este informe a crecente aposta polo mercado online entre estes establecementos, que pasou do 25,8% de 2019 ao el 38,9% no último ano.