O MARCO celebra o noveno aniversario con dúbidas sobre a súa continuidade

Esta fin de semana o Museo de Arte Contemporánea celebra o seu noveno aniversario cun horario máis festivo, abrindo na noite e na madrugada da fin de semana. A diferenza doutros anos, nesta ocasión apenas hai actividades creadas a propósito para a efeméride como é o caso do ciclo “Resistencias”, coa presenza de dous coreógrafos recoñecidos internacionalmente como son Olga de Soto e Juan Domínguez. Isto estará combinado coa programación doutros eventos como o festival de acción Chámalle X ou ART Futura. Esta reducción débese á delicada situación do centro polo impago dos seus patronos, que acumulan débedas por importe superior ao millón de euros.

Iñaki Martínez Antelo, director do MARCO, declara nunha entrevista publicada hoxe no Faro de Vigo que o museo para por unha situación moi complicada. O motivo é que os patronos que compoñen a fundación non están ao corrente dos seus pagamentos, en total entre NovaGalicia, a Xunta, a Deputación e o Ministerio de Cultura adebedan máis dun millón de euros. A situación afecta a programación de tal xeito que exposición previstas para final de ano xa se adiaron de prazo e xa hai proxectos no aire. A vindeira reunión do padroado da entidade terá lugar en decembro, onde se poderán aclarar se son impagos ou retrasos e determinar o futuro da institución. Nesa entrevista, o director do MARCO asegura que “estamos ao límite”.