“Os centros culturais teñen reservado un rol moi importante no novo século” asegurou Roberto Varela na apertura do o “I Foro Internacional de Espazos para a cultura” que organiza a Fundación Cidade da Cultura. Entre os cometidos deste encontro figura o de crear e consolidar o complexo do Gaiás como un escenario de “intercambio” que propoña estratexias de actuación acordes co contexto e, ao mesmo tempo, dar a coñecer outras realidades das grandes infraestruturas culturais, chamadas a ser xeradores de desenvolvemento económico. Cargos directivos de centros como o MOMA, o Centro Niemeyer, La Casa Encendida, a Fundação Calouste Gulbenkian de Lisboa ou o IRCAM estarán presentes desde hoxe na Cidade da Cultura para explicar os seus mecanismos de traballo. "Cómpre reivindicar o papel da cultura nun mundo globalizado" asegurou Alberto Núñez Feijóo, na inauguración do foro.
