O río Sil é fecundo en explotacións auríferas romanas, pero o número deste tipo de importantes xacementos arqueolóxicos non para de medrar. La Voz de Galicia publica hoxe o achado de Carlos Rueda e José Ferreiro, quen recoñeceron unha antiga mina de auga empregada polos veciños da aldea de Lousadela para traer a auga ao lugar, e lles resultou estraña a súa factura. Acompañados polo arqueólogo monfortino Iván Álvarez examinaron de novo o lugar e Iván Álvarez concluíu que se trataba dunha antiga explotación aurífera romana dos séculos I ou II d.C.
Non é o único achado. Na área está tamén outra explotación coñecida coma O Covallón, posiblemente desta época. Como estaban unha e outra sen catalogar, Patrimonio autorizou no seu momento na área unhas prospeccións mineiras actuais.
