O ciclo Picaversos leva a poesía á noite compostelá

Visibilizar a poesía fóra do eido exclusivamente literario e ampliar o seu público. Reunir voces diversas sen espazo conxunto nas programacións institucionais. Recuperar as lecturas poéticas amplas. Esta é a proposta que fai Picaversos un ciclo de recitais que coordinan Branca Novoneyra e Olalla Cociña e que ofertará noites temática no pub Modus Vivendi, en Compostela. O vindeiro 4 de outubro comeza a iniciativa cunha noite que ten como eixe o concepto "Incorruptibles".

O encontro contará coa presenza de Olga Novo, Martin Wu (The Homens) e Lupe Gómez, que recitarán tanto textos propios como alleos a partir das 21 horas. En vindeiras sesións abordaranse temas como "Feridos", "Inocentes", "Músicas" e, para rematar, "Lois Pereiro". A cita celebrarase cada quince días e a entrada custa dous euros.