Cultura reafirma a súa aposta polo Museo do Mar para os restos de Rande

A proposta do Concello de Vigo de crear na cidade un museo sobre a Batalla de Rande con restos dos barcos afundidos non terá o apoio de Cultura. A Consellaría lembrou que o Museo do Mar actúa como coordinador das actuacións de arqueoloxía subacuática do país, e como tal, albergará "todas as pezas que se extraian das prospeccións" deste tipo, desbotando a posibilidade de que outro lugar acolla pezas destes galeóns. Ao tempo, a Asociación Cultural e Deportiva de Redondela, promotora do proxecto do centro de interpretación Meirande, neste concello, saíu onte en defensa do seu proxecto, que conta xa con fondos da Feder para se pór en marcha.

Con esta resposta, Cultura desbota tamén as reclamacións que nas últimas semanas se estaban a facer desde a Costa da Morte. Diferentes concellos e institucións desta zona solicitaban que os restos que se recuperen dos pecios afundidos na zona, como as pezas extraídas este verán da Ría de Corcubión, fiquen expostas en museos da comarca.