Cultura desbota a recuperación dos galeóns de Rande

O proxecto de recuperar e reconstruír un dos galeóns afundidos na Ría de Vigo durante a batalla de Rande non poderá facerse realidade. A Consellaría de Cultura considera que a UNESCO é contraria a proxectos coma este, ao recomendar que os pecios se manteñan mergullados. O departamento, no entanto, retomará as prospeccións arqueolóxicas nesta zona. Do mesmo xeito, empregará o soto do Museo do Mar de xeito provisorio para conservar e manter os restos que resulten das investigacións submarinas feitas en Galicia, e está a estudar a posibilidade de que o Museo albergue o futuro Centro de Arqueoloxía Subacuática. Do mesmo xeito, Patrimonio continuará a elaboración da Carta Arqueolóxica Subacuática de Galicia para localizar de xeito detallado os restos que se conservan nas nosas costas.