Galicia Classics súmase ás homenaxes a Cunqueiro

A Agrupación Lírica Ofelia Nieto estrea mañá, venres 23, en Ferrol o espectáculo poético-musical O soño dourado. De Rosalía a Cunqueiro. A obra, dirixida por Antón de Santiago, mestura o recitado de textos do mindoniense con outros de Rosalía, Curros, Cabanillas ou Novoneyra, entre outros, na voz do propio De Santiago e da soprano Patricia Morchón, todo co acompañamento dunha formación de violín, chelo e guitarra. O espectáculo fai parte do Ciclo Galicia Classics, que se suma así ás homenaxes do centenario de Cunqueiro. Logo da estrea, no auditorio Novacaixagalicia de Ferrol, a obra visitará a Cidade da Cultura o vindeiro 2 de outubro.