Alexandre Bóveda
Hoxe cúmprense 75 anos do fusilamento de Alexandre Bóveda. Unha efeméride que a fundación que leva o seu nome celebra cunha serie de actividades en varias localidades relacionadas coa vida do intelectual. Entre Pontevedra e Poio desenvolverase unha ofrenda institucional, un acto cívico e a entrega do VI Premio Día de Galiza Mártir, que este ano recae en Xosé Álvarez Castro, da asociación pontevedresa de recuperación da memoria histórica Sempre con vós, cidadanía pola verdade, e autor do blog Pontevedra nos anos do medo que difunde a historia da represión nesta comarca. Ademais, na Coruña celebrouse onte unha homenaxe que reuniu ao secretario da RAG, Xosé Luís Axeitos, e a Xosé Ramón Freixeiro, en representación da Universidade. Nesta mesma cidade aínda se pode ver a exposición Formas de ver a Bóveda, que recupera a figura do intelectual a través de obra gráfica, pintura, escultura e manuscritos de artistas, escritores e escritoras de todo o país.
