As formas da vida

A existencia é incerta, ten moito de fugaz, de transitoria e de complexa. E todas esas experiencias, sensacións ou sentimentos plasmárona os artistas no seu traballo. Uns como vasos de auga, outros como flores murchas ou mapas, paisaxes… todas esas formas son as que busca Celia Adrián, para propoñer un percorrido a través de Atalaia, o soportal de arte de Culturagalega.org

Antón Patiño, Rubén Ramos Balsa, Xoán Anleo, Manuel Vilariño, Fernando Casás e Mar Caldas, entre outros, son os artistas escollidos por Celia Adrián, para propor un percorrido artísticos que fale das diferentes formas de expresar a vida. Este itinerario virtual insírese dentro do proxecto de comisariados en liña que comezaron hai uns meses en Culturagalega.org. Nesta ocasión é a estudante do Mestrado de Arte da Universidade de Santiago Celia Adrián, a que fai unha visita polos arquivos para reflexionar sobre o que bautizou como "Tránsito vital".

Atalaia é o centro de recursos para coñecer aos artistas, as obras, os eventos, as publicacións e as entidades vinculadas á arte contemporánea en Galicia que mantén desde hai un ano Culturagalega.org. O proxecto está coordinado pola Sección de Artes Visuais Contemporáneas do Consello da Cultura Galega e propon a críticos, profesionais e estudantes de arte contemporánea un percorrido guiado polo catálogo que está na rede, para redescubrir as obras dos artistas.