Redondela convértese na capital das marionetas ata o domingo

Fiel ao seu obxectivo inicial, de achegar o mundo das marionetas á maior cantidade de público posible, hoxe arrinca en Redondela a XII edición do Festival Internacional de Títeres. Unha cita na que participan 14 compañías chegadas de 6 países (Francia, Portugal, Alemaña, India, Rusia e de diferentes partes de España) que encherán as rúas, prazas e escenarios desta localidade pontevedresa. Ademais, a edición deste ano complétase cun obradoiro infantil de construción de monicacos e unha exposición fotográfica que achega un punto de vista diferente sobre o perfil dos que se dedican ao mundo dos monicreques.