Cultura apoia a dixitalización de parte do fondo da Fundación Penzol

Unha achega de 50.000 euros da Consellaría de Cultura permitirá achegar ao catálogo dixital do Arquivo e da Biblioteca de Galicia unha selección de fondos dixitalizados da Fundación Penzol. O conselleiro Roberto Varela asinaba esta mañá un convenio co vicepresidente da Fundación, Alfonso Zulueta, polo que esta entidade se encargará de dixitalizar e catalogar 521 documentos históricos da cultura galega e 913 fotografías do Fondo Otero Pedrayo que fan parte do seu legado, e que se conservará fisicamente na sede da Fundación. O convenio afecta a textos que van desde a Idade Media ata o século XX de autores como Rosalía de Castro, Montero Ríos, Alfredo Brañas, Pondal, Curros Enríquez, Pardo Bazán, Antón Vilar Ponte, Castelao, Bóveda, Vicente Risco ou Valle-Inclán.