Bailes con distinto ritmo

Nunca viviu un momento tan frutífero. Hai máis compañías de danza profesionais ca nunca, liñas de axudas concretas para estimular a creación e a investigación, unha unidade de produción da compañía de teatro público, varios festivais deste xénero… pero tamén é certo que se perderon moitos intentos no camiño (algúns tan sonados como o festival en Pé de Pedra…) . Esta semana celébrase o Día Internacional da Danza e, cada un festéxano por separado.

“Tendo en conta que é unha data tan sonada e que todos organizan actividades, se cadra, o mellor era facelo noutra época, para darnos máis a coñecer” afirma Mercedes Suárez, directora do Centro Coreográfico Galego, entidade que organiza a I Mostra de Danza de Galicia. Trátase dun encontro no que están presentes preto de 27 compañías de todo o país e que pretende conmemorar o Día Mundial da Danza, que se celebra cada 29 de abril. “Convidámolas a todas e hai variedades para todos os gustos desde danza clásica, contemporánea… ata hai unha compañía de danza española” asegura Suárez dun programa no que tamén destaca a presenza de “tres compañías de integración, é dicir, que traballan con xente con minusvalías ou con síndrome de down, que aínda que non son profesionais, están a facer un traballo eloxioso”. A primeira mostra destas características terá lugar desde o martes ata o sábado, e colle o formato de show case. “Son moitas compañías, en poucos días e procuramos que ofrezan un panorama xeral do que é o estado da danza en Galicia, e para que fose o máis representativa posible convidamos a todo o mundo”. O programa remata o sábado cun espectáculo na Praza de Cervantes no que participarán 8 formacións artísticas. Son todos os que están pero non todos os que son, porque non todo o mundo baila a mesma coreografía.

O ritmo do sector
Malia que algúns membros que conforman Danesga, entidade que agrupa ao 80% das compañías do sector, participan da “I Mostra de Danza”, existe outra actividade convocada en paralelo por este colectivo. Terá lugar esta tarde, no Auditorio de Galicia (20:00 horas, entrada libre) onde celebrarán que a compañía La Macana acaba de realizar a súa función número cen coa montaxe Vén. “É unha cifra redonda que ten unha gran significación por detrás, xa que é o primeiro espectáculo dunha compañía e que estivo nunha vintena de países europeos, desde Francia ata Finlandia, pasando por Holanda e Eslovenia” asegura Nuria Sotelo, presidenta de Danesga. Este número ten outras implicacións porque segundo explica esta bailarina, “ningunha compañía galega tiña feito cen función do mesmo espectáculo e, ademais, tivo máis función fóra que en Galicia”. Por ese motivo, hoxe tamén celebrarán o Día Mundial da Danza a golpe do seu propio manifesto. Un documento no que denuncian a falta de publicación do Plan do Centro Coreográfico Galego, a falta de rigor e de trasnparencia das audicións desta entidade, e a “que as convocatorias de subvencións á produción da AGADIC non se corresponden coas necesidades e realidade do noso sector, promovendo así un sector minoritario e minguado”. Nuria Sotelo matiza que “apreciamos certo escurantismo e falta de rigor á hora de definir o plan e as liñas de acción. Imos descubrindo as súas actividades a pingagotas e iso danos a pensar que se trata dunha cousa improvisada”.

O Centro Coreográfico Galego
En agosto de 2010 o Consello de Dirección de Agadic, nomeaba a Mercedes Suárez, directora do Centro Coreográfico Galego como directora desta unidade de produción dedicada a danza. Desde entón, esta profesional estivo a traballar en dúas direccións. Unha interna, de solventar o problema de contratación que permita ter un corpo de bailaríns o máis estable posible para poder desenvolver as producións propias; e unha externa, de confeccionar un plan de traballo que vai desde actividades de formación ata os espectáculos do Centro Coreográfico Galego. A directora explica que “conseguimos solventar este problema administrativo que nos permitía un contrato de longa duración para bailaríns, que nos vai posibilitar facer máis función e mesmo saír fóra cos espectáculos”. Canda isto, Mercedes Suárez xa está a preparar a temporada de 2012, cun proxecto que se desenvolverá no marco do Festival Mozart e coa colaboración da Orquestra Sinfónica Galicia. “Imos facer o Crebanoces para xuño de 2012 e, atendendo á orixe dese ballet (unha obra feita para rapaces), imos integrar as escolas de danza que existen en Galicia para participar con estes profesionais”. E mentres tanto, “abrimos os ensaios do Centro Coreográfico para profesionais; continuamos co programa de investigación e de formación que, estreará novo formato xa que pretendemos concentralo no mes de xullo, que é cando as compañías e profesionais teñen máis tempo para poder asistir e que atenderá a todos os estilos”.

En todo este tempo, houbo xuntanzas puntuais entre Danesga, o Centro Coreográfico Galego e outras entidades en Agadic. Desde ambas partes confirman a existencia de visións diferentes con respecto ao mundo da danza e como ha de ser a súa xestión, a súa comunicación e a súa organización. Esta semana, bailarán xuntos e por separado, pero todos coinciden no mesmo obxectivo “dar a coñecer a danza á sociedade”.