A fervenza de Ézaro volta fluir con regularidade

Logo de case trinta anos, o río Xallas volta desembocar con normalidade na Fervenza de Ézaro. Unha resolución de Augas de Galicia, ante unha denuncia da plataforma Ríos con Vida, obrigou á empresa Ferroatlántica, propietaria do encoro de Santa Uxía, a permitir un fluxo permanente de caudal de dous metros cúbicos por segundo. Ata o de agora, só se abría o encoro en horas determinadas, aínda que cun caudal máis amplo do que terá a partir de agora.