Novos proxectos continúan a recuperación de Aquis Querquennis

A Fundación Aquae Querquennae-Vía Nova, que xestiona o centro de interpretación do campamento romano Aquis Querquennis, en Bande, aprobou onte os seus proxectos para o vindeiro ano. Entre estas iniciativas está ampliar o traballo de escavación deste depósito e iniciar traballos para illar os restos das augas do encoro das Conchas, que os mergullan durante parte do ano. Ao tempo, a fundación aprobou editar dúas guías deste espazo e mais dunha páxina web e a vindeira organización dun simposio. En canto ao centro de interpretación, iniciáronse xa as obras de remodelación para desenvolver un proxecto museístico sobre as viaxes na época romana.