Ángeles González-Sinde anuncia tres millóns de euros para dixitalizar salas de cine

É unha das grandes eivas da exhibición cinematográfica, a conversión dos cinemas analóxicos en dixitais. Por iso, no marco da Conferencia Sectorial sobre Cultura desenvolvida onte en Oviedo a ministra de Cultura, Ángeles González-Sinde falou da necesidade da súa “renovación” e anunciou axudas por importe de tres millóns de euros. Foi un dos múltiples temas que figuraban na axenda desta reunión á que asistiron os representantes de todas as comunidades autónomas, Ceuta e Melilla. Na xuntanza celebrada en Oviedo falouse da creación dun gran portal cultural (para o que pediu a colaboración das autonomías), ao tempo que informou do estado actual do Plan Xeral do Circo. Neste último punto o director xeral do Instituto Nacional das Artes Escénicas e da Música (INAEM), apuntou que se está a traballar na redacción dunha Axenda Estratéxica do Circo que recollerá o diagnóstico dos problemas e as propostas realizadas polos representantes deste sector.