Escáner láser e fotografía aérea para recoñecer a realidade territorial galega

O Estado dispón dun novo Sistema de Información Xeográfica que se basea nas ortofotos -a fotografía aérea- e nun novo e preciso sistema de escaneado láser do territorio chamado cobertura Lidar. Este sistema serve para planificar boa parte das políticas que teñen que ver co territorio: urbanismo, medio ambiente, agricultura ou patrimonio. A metade occidental de Galicia, que coincide coa de maior densidade de poboación, carecía deste novo sistema de cartografía e, polo tanto, tiña información non compatible co sistema de información xeográfica estatal. Hoxe, o Consello da Xunta acordou investir 200.000 euros na elaboración da nova cartografía da banda occidental de Galicia a través deste sistema, o cal permitirá, segundo a administración autonómica, "recoñecer a realidade e identidade galega".