Unha vez máis é o título dunha intervención que se pode ver no CGAC desde esta fin de semana, que consiste en seis mil quilos de barro sen cocer que se irá deteriorando durante o tempo que transcorre esta exposición. É un dos xeitos no que a artista brasileira de orixe italiana, Anna Maria Maiolino, transmite a súa idea de transformación, de evolución, de tránsito, constantes na súa xa longa e coñecida traxectoria. Trátase da primeira restropectiva en Europa desta artista que fala da dicotomía (dentro-fóra, positivo-negativo, ausenza-presenza….) a través de diferentes técnicas artísticas. A exposición, que se pode ver ata o primeiro de maio no CGAC, abre o ano expositivo desta institución.
