Comeza a Semana da Ciencia en Galicia

Un ano máis, todo tipo de institucións, especialmente museos e centros de ensino, celebran estes días a IX Semana da Ciencia. Desta volta, a maior parte das actividades articúlanse arredor do Ano Europeo da Creatividade e da Innovación; o Ano Darwin e o Ano Internacional da Astronomía. Deste xeito ata o vindeiro día catorce de novembro, os Museos Científicos Coruñeses contarán cunha programación especial, que inclúe a estrea do filme en 3D SOS Planet. Tamén na Universidade de Vigo teñen un completo programa de iniciativas, e ata unha vintena de entidades desenvolverán actividades por todo o país, segundo anunciou a Xunta.