Imaxe do Galiciencia 2012
A divulgación científica chega con forza á axenda de actualidade. Por unha banda, centros educativos e colectivos de todo o país participan da terceira edición do Día da Ciencia en Galego, que concentra na xeira de hoxe o groso das súas actividades. Presentacións como a do Manual de Galego Científico, de Carlos Garrido e Carles Riera o vindeiro día sete enmárcanse tamén nesta celebración. De xeito paralelo, os Museos Científicos coruñeses fixeron públicos os gañadores dos Premios Prismas de divulgación deste ano. O audiovisual Escépticos ¿Fuimos a la Luna?, o web Naukas ou un premio especial a Ramón Núñez foron algunhas das propostas incluídas no palmarés.
De xeito paralelo, ao longo de todo o mes, diferentes iniciativas galegas participarán da Semana da Ciencia que coordina a Fundación Española para a Ciencia e a Tecnoloxía. Entre elas atópase a nova edición da feira Galiciencia, que se celebrará en Ourense entre o 21 e o 23 deste mes.
