A Fundación Barrié apoiará o labor editorial da Academia

O presidente da Real Academia, Xosé Luís Méndez Ferrín, asinaba esta mañá un convenio con Jose María Arias, presidente da Fundación Barrié. Mediante este acordo, a fundación apoiará o labor editorial da RAG, e para comezar verán a luz, na nova colección Clásicos da Academia, as obras completas de Manuel Antonio. A obra estará composta por catro volumes, dedicados á prosa, poesía, correspondencia e a biografía do poeta rianxeiro. A colección centrarase en publicar material inédito e edicións críticas en autores que carecen delas. Ademais, a Barrié apoiará as vindeiras edicións dos dicionarios que elabore a institución.