Representantes da plataforma Queremos Galego presentaban onte no rexistro do Parlamento de Galicia 30.000 sinaturas que solicitan que a cámara debata unha Iniciativa de Lei pola Garantía dos Dereitos Lingüísticos. Segundo asegurou Carlos Callón, voceiro da entidade, esta é só unha primeira remesa de sinaturas, aínda que xa duplican o mínimo esixido para unha Iniciativa Lexislativa Popular (ILP). No entanto, as sinaturas recollidas non implican que se vaia debater o texto proposto como unha ILP.
A Mesa do Parlamento negara o pasado mes de marzo a posibilidade de tramitar este tipo de Iniciativa. Segundo esta entidade, o proxecto afectaba a materias de desenvolvemento básico do Estatuto de Autonomía, que non poden ser obxecto de propostas deste tipo. A proposta de Queremos Galego, no entanto, chegará á cámara como unha inciativa do Bloque Nacionalista Galego, á que o PSdeG xa anunciou o seu apoio.
