Mosteiro de San Pedro de Rocas
Desde a Ponte Romana de Ourense parte este roteiro de 18 quilómetros que nos achega ata o mosteiro máis antigo da Ribeira Sacra: San Pedro de Rocas. Un itinerario que nos mergulla nas orixes do mundo medieval e nos permite coñecer o rico patrimonio das proximidades da cidade de Ourense.
San Pedro de Rocas, no concello de Esgos (Ourense), é un dos mosteiros máis antigos de Galicia e de Europa, aínda en pé. Unha inscrición aparecida no mosteiro falaba de que no ano 573 este fermoso lugar servía de refuxio a numerosos eremitas. Aínda que o lugar foi abandonado, a arqueoloxía demostrou que no século IX San Pedro de Rocas xa existía como mosteiro. Un cazador chamado Xemondo localizaría as súas ruínas de novo no século XI. E comezaría a última vida do mosteiro, que nos chega ata hoxe.
Para chegar a el, subimos desde a Ponte Romana de Ourense por un sinxelo roteiro de 18 km. Este itinerario foi organizado pola Vicerreitoría do Campus de Ourense e os directores do proxecto foron José García Calvo e Beatriz Vaquero.
