A banda sonora da túa navegación

¿Queres que unha selección de música galega actual te acompañe na túa navegación de Internet? No noso perfil de MySpace creamos dúas listas de reprodución musical coas novidades da música galega en todos os seus estilos, que nutrimos continuamente con novas achegas que te axudan a seguir o pulso da actualidade musical do país. Máis de tres horas de música continuada con selo de orixe no país.

A creatividade musical do país, en todos os seus xéneros de expresión, pode formar parte da banda sonora que acompañe durante a navegación aos usuarios de culturagalega.org. A través da extensión na rede social MySpace do soportal MeGA (Música en Galicia) póñense a disposición pública dúas listas de reprodución musical (playlists) de artistas e grupos galegos dos máis diversos estilos. O reprodutor da páxina de MeGA en MySpace – que pode executarse de maneira independente ao perfil- ofrece actualmente máis de 60 temas musicais distribuídos nestas dúas listas das que unha ofrece temas cuxas letras sexan exclusivamente en lingua galega mentres que na outra poderanse escoitar estes temas así como os que estean en castelán, inglés, francés ou calquera outro idioma. As listas engaden continuamente novas cancións dos artistas galegos presentes en MySpace e que tamén pasan a formar parte da súa lista de amigos. No MySpace de MeGA tamén pode accederse a unha recompilación de vídeos musicais e noticias sobre a escena musical.