A batalla librábase en Madrid, onde o Goberno Central tiña a última palabra sobre se concedía unha pórroga sobre unha partida orzamentaria para a construción da sede do Centro Coreográfico Galego. Unha pregunta da deputada galega, Belén do Campo (PPdG), no Congreso dos Deputados avanzaba o desenlace: o Ministerio de Cultura non concede unha pórroga sobre esa partida financeira, o que implica que Agadic deberá devolver esta axuda de 1.4 millóns de euros máis os intereses. Segundo fixo público o Partido Popular da Coruña nunha rolda de prensa, o Executivo xustifica esa decisión en que “non é posible modificar os prazos fixados” e que a variación requería unha aprobación mediante “unha norma igual ou superior” á súa concesión, é dicir, por real decreto. Pola súa banda, Agadic confirmou que aínda non recibiu ningunha notificación oficial pero que se mantén na súa postura inicial, de construír ese edificio na Coruña.
