Salomé protagoniza a temporada do Salón Teatro

“É como a miña posta de longo” afirmaba Blanca Cendán, directora do Centro Dramático Galego, na presentación da programación de aquí a final do ano do Salón Teatro. Nun tempo récord, Cendán elaborou unha programación que inclúe un prato principal: a produción propia do CDG con Salomé; máis unha serie de estreas teatrais da temporada, desde Teatro do Noroeste (Historias peregrinas) ata Lagarta Lagarta con Cásting (a comedia), ademais da cesión de espazo para a Feira Galega das Artes Escénicas e Cineuropa. Na rolda de presentación, Roberto Varela, conselleiro de Cultura, aproveitou para lembrar a figura do Consello Asesor do CDG e os 64 días de actividade do Salón Teatro neste último cuatrimestre.

Hai desde estreas de compañías dun longo percorrido como Teatro de Ningures ou Lagarta Lagarta ata montaxes de vangarda como a que presenta Ónfalo Teatro pasando por obras para nenos na programación de Nadal (Limiar Teatro, Berrobambán, Panamesiana Teatro, Títeres Trompicallo). Ademais, o Salón Teatro tamén continuará co seu espazo para música co seu “ST Música Presente”.

Formación continua
Blanca Cendán insistiu no interese do CDG de desenvolver un programa de formación cotinuada para “aproveitar esos momentos de lagoa para completar os ocos con profesionais”. Ademais, Cendán amosou o seu interese por continuar por proxectos como “Dramaturxias de actualidade” para creación dramática aínda que “haberá que ver como se mantén a partir do vindeiro ano 2011”.