O fotoperiodista Emilio Morenatti protagoniza o festival Proxecta

As imaxes de Emilio Morenatti exhibiron desde sempre un decidido compromiso en retratar desastres, guerras e situacións de conflicto. Ata tal punto, que no ano 2006 foi secuestrado na cidade de Gaza. Hoxe, Morenatti contará a súa experiencia en primeira persona no marco de Proxecta, o festival da fotografía de Vilagarcía. Ademais da súa voz, poderase ver unha exposición coas súas imaxes na principal rúa da cidade baixo o título de Refuxiados. Canda iso, o programa inclúe unha serie de proxeccións fotográficas nocturnas ao aire libre no que se poderán ver fotos dos mellores fotoxornalistas do momento como o irané Reza, a portuguesa Teresa Sá, o vigués Jorge Candán e campión de España de fotografía e vídeo submarino ou o ourensán Manuel Outumuro, coñecido fotógrafo de moda.