Co gallo do centenario do nacemento de Luís Seoane, varias entidades programaron destacadas actividades conmemorativas. A última en sumarse ao acontecemento foi a revista Grial, que publica un número arredor da personalidade e a obra do artista, así como sobre as relacións entre as distintas pólas do galeguismo despois da guerra civil española (1936-1939). Ramón Villares, que ademais é coordinador deste número, Silvia Dolinko, Xosé Díaz, Henrique Monteagudo e Carlos Lema son os autores dos artigos nos que se pretende afondar na figura deste polifacético intelectual.
