Un láser desenvolvido en Vigo limpará o claustro da Catedral de Santiago

Nos anos sesenta cubriuse con cera fundida o friso do claustro da catedral de Santiago, unha xoia do renacemento galego. Co tempo, esta medida, que pretendía salvar a pedra da intemperie, acabou provocando desprendimentos na superficie deste monumento. Agora, un láser desenvolvido polo departamento de Física Aplicada da Universidade de Vigo servirá para limpar a capa de cera sen danar o granito. Un acordo entre a Dirección Xeral de Patrimonio e este departamento permitirá facer a primeira proba nun monumento real deste método, que leva seis anos a se investigar na facultade olívica. De funcionar axeitadamente, o sistema podería empregarse noutros monumentos afectados polo mesmo problema, como a fachada de San Martín Pinario ou as bases e columnas do Pórtico da Gloria.