O debate sobre a apertura do Pazo de Meirás tivo onte dous escenarios. Un en Sada, onde o alcade, o nacionalista Abel López, denunciou atrasos na apertura do centro. E outro no Parlamento onde o BNG presentou unha serie de iniciativas alegando que a Xunta pode forzar a apertura do Pazo, declarado BIC hai un ano. A Consellaría de Cultura replicou a uns e a outros que a única “fórmula viable” para garantir as visitas é esgotar a vía do diálogo (hai unha xuntanza prevista para a vindeira semana) e que a “legalidade vixente non lle permite á Administración exectuar de oficio a apertura dunha propiedade privada”. Ademais, puxo como exemplo o Castelo de Pambre, en Palas de Rei, onde o seu propietario foi multado e a sanción non facilitou a súa apertura.
