Demiten os coordinadores provinciais e central de normalización lingüística

Onte os cinco responsables da coordinación dos equipos de normalización lingüística de Galicia -un central e catro provinciais- comunicaron por carta aos centros a súa dimisión para o vindeiro curso. Tratábase de prazas ás que se accedía a través de concurso de méritos e elixida polos docentes, na que participaban profesores do sistema educativo galego en comisión de servizo durante un máximo de seis anos. A Coordinadora de Equipos de Normalización Lingüística manifestou a súa solidariedade cos cinco profesionais e "mostran a súa comprensión á hora de presentar a súa renuncia xa que observamos como desde a Secretaría Xeral de Política Lingüística se está a lexislar en contra do traballo que viñeron desenvolvendo estes anos e en contra da nosa lingua". A Consellería de Educación asegura non ter constancia da dimisión.