Cultura presenta as súas actividades para o día das letras

O Centro de Ensino do Courel acollerá o vindeiro 17 de maio o espectáculo poético e teatral Tender a man no que Branca Novoneyra e Yolanda Castaño renden unha homenaxe a Uxío Novoneyra. Esta é unha das iniciativas coas que a Consellaría de Cultura conmemorará este Día das Letras, segundo anunciou esta mañá Francisco López, director xeral de Promoción e Difusión da Cultura. Canda a isto o mesmo día farase unha declaración institucional, e entre o 20 de maio e o 1 de xuño programarase o ciclo de sete concertos Interseccións. A ollada de Novoneyra. O proxecto conta coa participación de Emilio Cao en colaboración Branca Novoneyra, a cantante Carmen Rey e mais o pianista Manuel Gutiérrez. Canda a isto, Cultura distribuirá a banda deseñada Uxío Novoneyra. A voz herdada de Kike Benlloch e David Rubín e mais unha nova edición do poemario Os eidos.