Guía para peregrinos por onda o mar

O trazado do Camiño Portugués da Costa, recoñecido pola Xunta como ruta oficial de peregrinación, está por fin dispoñible na rede. O Concello da Guarda adiantouse á propia Sociedade de Xestión do Plan Xacobeo e dispoñibiliza para Google Maps e Google Earth as etapas desta vía desde Viana do Castelo ata Compostela. Segundo explican desde o Concello, técnicos contratados polo Xacobeo visitaron a comezos deste ano a zona para delimitar o percorrido do roteiro. A coincidir coa celebración dunha peregrinación para reivindicar este trazado, o goberno local decidiu subir ao seu web este percorrido completo. De cara a vindeiras datas, anúncianse novas accións de promoción da vía. Achegámosche o percorrido desta vía desde Viana ata Pontevedra, por onde xa se une ao Camiño Portugués, para Google Earth.