Comezan os traballos para delimitar novas rutas xacobeas

En breve comezarán os traballos de investigación para delimitar o Camiño de Inverno e mais o Portugués pola Costa a Santiago. A Consellaría de Cultura convoca hoxe a contratación dun estudo para documentar o trazado histórico destas vías de peregrinación. Dotado con 45.000 euros, o contrato comprende os traballos de documentación "textual, cartográfica, arqueolóxica e etnolóxica ou doutras naturezas" que permita establecer o percorrido destes camiños. Ademais, recollerase tamén a información sobre o uso destas vías, a orixe dos peregrinos que as empregaban ou a súa evolución histórica, recollendo tamén as rutas sinalizadas actualmente por diferentes colectivos.