O Parlamento Europeo eloxia a Cidade da Cultura pero non achega financiamento

A visita dunha delegación de eurodeputados da comisión de Cultura e Educación do Parlamento Europeo serviu para darlles a coñecer dous dos proxectos máis destacados a nivel cultural: a cidade da Cultura e o Xacobeo. Para o segundo, o vicepresidente desa comisión, Morten Løkkegaard, explicou que o Parlamento concedeu 1.800.000 euros para accións transfronteirizas que xa se estaban a realizar, como a exposición de Xelmírez que está de xira por Europa. Ademais, anunciou o investimento de 600.000 euros para desenvolver un proxecto piloto que permita crear unha ruta específica para bicicletas e que sirva, ademais, para apoiar o turismo sostible. En canto ao proxecto da Cidade da Cultura, Løkkegaard eloxiou a súa ambición pero tamén aclarou que o Parlamento non ten acordado ningunha partida financeira para esta infraestrutura.