O Plan de Acción Turística non favorecerá a creación de novos establecementos

Favorecer a calidade e a mellora de instalacións existentes fronte á creación de novos establecementos en zonas de baixa ocupación. Esta é unha das principais medidas do Plan de Acción de Turística de Galicia, cuxas principais liñas presentaba onte o conselleiro de Cultura, Roberto Varela, no Parlamento de Galicia. Canda a esta aposta, o plan quere promover plans específicos arredor do Turismo Naútico-fluvial, o Enoturismo, o de Turismo de Golf e mais produtos específicos centrados na natureza. Por outra banda, desenvolveranse medidas para mellorar a sinalización xeográfica e turística do país así como un mapa de recursos do sector que organizará o país a partir de microdestinos e que será a base de futuras actuacións específicas. Varela adiantou tamén que se traballará a sensibilización social de cara aos visitantes e que continuarán as campañas promocionais do noso país a nivel internacional.