Madrid acolle esta semana, entre os días 17 e 19, a Feira Internacional de Turismo, principal evento do sector a nivel estatal. Como é habitual nesta cita danse a coñecer as novas iniciativas para atraer visitantes ao noso país, desta volta nun posto de mil metros cadrados con ambientación pacega. Na presentación desta delegación, a directora de Turismo de Galicia, Nava Castro, destacou a aposta autonómica polos Parques Naturais, e en particular polo das Illas Atlánticas como destinos turísticos nesta nova edición. O programa de presentacións que artella Turismo de Galicia en colaboración con concellos, empresas e outras institucións conta ademais cunha importante presenza de propostas arredor do deporte (surf, golf, vela ou triatlón), a gastronomía (coa feira Xantar ou o viño do Ribeiro, a guía gastronómica de Lugo ou os lagares rupestres de Galicia) e diferentes propostas vencelladas ao turismo termal, como son Termatalia, ou o Club da Auga.
No ámbito cultural, o 525 aniversario da arribada da caravela Pinta a Baiona, as actividades da Cidade da Cultura, a nova ruta Rosaliana de Padrón, Ames e Brión ou o Festival do Mundo Celta de Ortigueira son as principais citas presentes na feira.
