Os representantes de CIG-Ensino, STEG, CCOO e UGT retiráronse onte da Mesa Sectorial na que a Consellaría de Educación presentaba o decreto para pluringüismo no ensino. Os sindicatos denunciaron que o prazo para presentar alegacións ao texto rematara antes da xuntanza, polo que consideran que non se podería incorporar ningunha das súas propostas ao decreto. Unicamente o colectivo ANPE mantivo o debate co departamento autonómico. Ademais, segundo sinala Xornal de Galicia, as formacións están a barallar a posibilidade de denunciar o futuro texto por vía xudicial. Pola súa banda, Educación sinalou que incluirá no mesmo unha proposta que se presentou na Mesa, referida á modificación da asignación lingüística dunha materia cando así o determine a maioría dos pais.
