O conselleiro de Educación, Xesús Vázquez, adiantaba onte que o texto definitivo do vindeiro Decreto para o Bilingüismo no Ensino estará listo en breve. No entanto, nos últimos días xurdiron novas protestas contra este proceso. Por unha banda, os editores apuntaron que non lles dará tempo a adaptar os libros de texto á nova normativa, ao que Vázquez respondeu que a maior parte dos mesmos servirán "porque non se muda todo o sistema". Pola súa banda, o colectivo Galicia Bilingüe denunciou que nos impresos para reservar praza nos centros de ensino para o vindeiro curso, non se lles permite aos pais seleccionar idioma para as aulas. Segundo eles, isto incumpre as promesas do Partido Popular ao respecto.
