Se a día de hoxe é difícil manter unha publicación periódica en Galicia, cabe pensar ata que punto isto puido ser aínda máis complexo a comezos do século XX. Entre 1925 e 1926 viron a luz en Sada 26 números da revista quincenal Mariñana. Nas páxinas desta publicación atopamos nomes tan destacados coma Lugrís Freire ou Antón Vilar Ponte entre outros. Artigos de costumes, novas, fotografías e debuxos da Galicia de entón, pequenas pezas de creación literaria e mesmo anuncios fan desta cabeceira unha obra de grande interese para curiosos e investigadores dos nosos días. Agora, no web do Concello de Sada, podemos acceder en formato PDF á única colección completa que se conserva desta curiosa iniciativa. Manuel Pérez Lorenzo, investigador da prensa local desta localidade, fálanos sobre a publicación e o seu contexto social.
