A aplicación do Decreto do Galego deberá comezar cun 50% de galego e castelán

O presidente da Xunta, Alberto Núñez Feijóo, recoñecía onte nunha entrevista a El Correo Gallego que a incorporación do inglés ao ensino se fará de xeito gradual. Na conversa, o presidente sinala que só os docentes que queiran darán aulas en inglés, e que se garantirá o equilibrio ao 50% entre galego e castelán mentres non se incorpore esta lingua. Mentres, ao longo da fin de semana, sumouse ás críticas ao Decreto do Bilingüismo a Asociación Galega de Editores, que sinalou que non poderán responder ás necesidades de materiais en diferentes linguas previstas na proposta de Educación. Pola súa banda, o Consello da Xuventude de Galicia e a Federación Galega de Relixiosos do Ensino de Galicia tamén se posicionaron contra este texto, mentres a Coordinadora de Traballadores pola Normalización Lingüística, publicou no seu web a súa propia análise encol da proposta, na que denuncia que, de se aprobar, non garantiría o coñecemento do galego no ensino.