A última hora da tarde a Xunta presentou o borrador do decreto do "plurilingüismo no ensino non universitario de Galicia". Confírmanse as filtracións dos últimos días. No ensino infantil, o "profesorado usará na aula a lingua predominante entre o alumnado e coidará que adquira, de forma oral e escrita, o coñecemento da outra lingua oficial de Galicia", sinala o borrador. Tamén o borrador do decreto establece que a oferta de materias en Educación primaria, ESO e Bacharelato "un terzo das horas semanais se oferte en galego e outro terzo en castelán, e prevese que o terzo restante se poida impartir en lingua(s) estranxeira(s)". Nesta noticia poden descargar copia do borrador.
