O Tribunal Supremo rexeita que os pais poidan escoller a lingua do ensino

Os pais non poden elixir o idioma no que estudan os seus fillos. O Tribunal Supremo expón este argumento entre outros para non admitir o recurso que presentou unha familia de Vigo para reclamar que o seu fillo non tivese clases en galego. O alto tribunal sinala que a liberdade de elección "conduciría a resultados absurdos, xa que todos poderían reivindicar unha instrución impartida en calquera lingua". A sentencia nega tamén que exista discriminación por razón de lingua contra os recorrentes, e mesmo indica que "a discriminación produciríase precisamente no caso de que a Administración autorizase o pretendido polo recorrente".