Castro de Trona
É un dos castros máis antigos de Galicia pero tamén dos menos coñecidos e, desde o martes é Ben de Interese Cultural na categoría de monumento. O Castro de Troña foi un dos primeiros asentamentos castrexos en que se levaron a cabo tarefas de restauración e posta en valor na comunidade galega e comezou a ser investigado nos anos vinte. Está datado entre o século VI a.C. e o I d.C., e sábese que foi abandonado paulatinamente a finais do século I d.C. con probabilidades de ter sido ocupado de xeito residual con posterioridade. As escavacións realizadas nos anos oitenta indicaron, tal e como figura no anuncio no DOG, “un certo proto-urbanismo ou ordenamento a través de lousados, canles de desaugamento ou vivendas con vestíbulo”.
