Vista do proxecto "Obra negra" no Espazo Anexo do Marco
Cando en México se fala de "Obra negra" todo o mundo sabe xa que se trata de espazos ou estruturas en construcións. E ese é o concepto sobre o que traballa Nicolás Combarro (A Coruña, 1979) no marco do proxecto "Punto de encontro" que organiza o MARCO para darlle cabida a propostas que nacen fóra dos límites físicos do museo. Neste caso, Combarro reconstrúe no espazo anexo do museo unha instalación que pretende representar á Panificadora de Vigo. Válese dela para iniciar a través dela unha discusión conceptual sobre a existencia e repercusión dunha construción que se acaba convertendo nunha icona da cidade, así como do seu proceso de transformación. Ademais, Combarro pretende reorientar a ollada do espectador sobre esta icona a partir dunha serie de fotografías e dun video, que se insiren na súa liña habitual de traballo.
