As cifras de participación oscilan entre as 100.000 persoas da organización e as 50.000 que contabilizou a policía local. No entanto os medios coinciden en sinalar que a de onte foi, se non a maior, unha das mobilizacións máis importantes que se desenvolveron a prol da lingua no noso país. A convocatoria da plataforma Queremos Galego contou coa presenza de destacados persoeiros públicos do mundo da cultura e da política, e foi apoiada por preto de 500 entidades. A plataforma anunciou a súa intención de promover unha Iniciativa Lexislativa Popular a prol da lingua.
