Os editores temen que este ano non haberá Cultur.gal pola falta de apoio de Cultura

O Cultur.gal é a gran feira da cultura do país, unha oportunidade para dar a coñecer os produtos culturais galegos e que na última edición congregou a 35.000 persoas. A Asociación Galega de Editores reuniuse a semana pasada co director xeral de Cultura para planificar e coordinar a presenza nas vindeiras feiras, cando López Barxas lle comunicou que non había orzamento para organizar a edición deste ano do Cultur.gal. Unha afirmación que non foi confirmada nin desmentida pola Consellaría de Cultura. Agora, os editores reuniranse a vindeira semana para ver que solucións e iniciativas desenvolver para este ano. En todo caso, o seu vicepresidente, Fran Alonso, apuntou que o futuro deste encontro pasa por crear unha fundación de carácter mixto que lle dea estabilidade ao acontecemento.