Manuel Rivas substitúe a Camilo González como membro electo da Real Academia Galega

O Plenario da Real Academia Galega acordou esta fin de semana nomear ao escritor e xornalista Manuel Rivas como membro electo desta institución. Rivas substitúe ao académico Camilo González Suárez-Llanos, finado en novembro do ano pasado. O novo membro da RAG é ben coñecido tanto pola súa faceta de escritor como de xornalista. Licenciado en Ciencias da Información pola Universidade Complutense iniciou a súa carreira xornalística con 15 anos e foi colaborador en múltiples medios, desde a revista cultural Luzes de Galicia, ata medios como La Voz de Galicia. Como escritor ten traballado en todos os xéneros literarios con gran éxito de público e crítica.