O reparto das enquisas encol do galego no ensino está a provocar diversos incidentes en centros de ensino de todo o país. Deste xeito, a Coordinadora de Equipos de Normalización denunciou que directores de centros recibiron chamadas para que non distribuísen trípticos informativos, que houbo ameazas de apertura de expedientes por este motivo e outros incidentes. Precisamente a resolución do Tribunal Superior de Xustiza encol da orde de Educación sobre como distribuir estas enquisad motivou interpretacións contrapostas entre esta consellaría e a CIG-Ensino. Finalmente, hoxe son os docentes de galego de Barcelona os que se sumaron ás protestas contra o proceso de consulta aos pais.
Pola súa banda, desde a Coordinadora de Traballadores de Normalización Lingüística anuncian a celebración o vindeiro 27 de xuño dunha Xornada de formación en dereitos e estratexias lingüísticas, que pretende achegar argumentos para o debate social na defensa do galego. O encontro celebrarase no Centro Sociocultural do Ensanche, en Compostela.
