A Fundación para o Fomento do Mar inicia os trámites para recuperar un galeón de Rande

O Santo Cristo de Maracaibo é un dos galeóns da Batalla de Rande que se atopan afundidos na ría de Vigo. Desde onte é o obxectivo da Fundación para o Fomento do Mar (Fomar), entidade conformada por varios ministerios, o Instituto Español de Oceanografía e o alcalde de Vigo. Segundo un acordo tomado polo padroado de Fomar, a entidade pretende localizar e rescatar o pecio que supoñen se atopa a 500 metros de profundidade para a súa posterior exposición. O investigador José Enrique Lechuga estará ao fronte da prospección que xa se tentara en varias ocasións. De feito o arquelógo Javier Luaces desconsellou a expedición con anterioridade polo estado do galeón.